ကုလအထူးကိုယ်စားလှယ် မြန်မာခရီးစဉ်အပေါ် သံအမတ်ကြီးဦးကျော်မိုးထွန်းအမြင်

News

ကုလအထူးကိုယ်စားလှယ် မြန်မာခရီးစဉ်အပေါ် သံအမတ်ကြီးဦးကျော်မိုးထွန်းအမြင်

ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Noeleen Heyzer တာဝန်ယူပြီး ပထမဆုံးအကြိမ်အဖြစ် သွားရောက်ခဲ့တဲ့ ခရီးစဉ်ဟာ မျှော်လင့်သလောက် အကျိုးမရှိဘူးလို့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် ဦးကျော်မိုးထွန်းက ပြောပါတယ်။

အထူးကိုယ်စားလှယ်ရဲ့ ခရီးစဉ်အတွင်း ထုတ်ပြန်တဲ့ ကြေညာချက်အပေါ် စစ်ကောင်စီက အပြင်းအထန် တုံ့ပြန်ခဲ့တာ ဘယ်လိုအကြောင်းတွေ ရှိနေပါသလဲ။ ကုလသမဂ္ဂ အထူးကိုယ်စားလှယ်ရဲ့ ခရီးစဉ်အပေါ် သံအမတ်ကြီး ဦးကျော်မိုးထွန်း ရဲ့ အမြင်ကို ကိုဉာဏ်ဝင်းအောင် ဆက်သွယ်မေးမြန်းထားပါတယ်။

ကိုဉာဏ်ဝင်းအောင်။ ။ ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Noeleen Heyzer ရဲ့ မြန်မာနိုင်ငံ ခရီးစဉ် ရလဒ် အပေါ်မှာပေါ့လေ သံအမတ်ကြီး ဘယ်လို သုံးသပ်မိပါလဲ။

သံအမတ်ကြီး ဦးကျော်မိုးထွန်း။ ။ Special Envoy မြန်မာနိုင်ငံကို သွားတယ်။ သွားပြီး ပြန်လာပြီးတော့ ဒီ special envoy က ပြောတာတွေနဲ့ ပတ်သက်ပြီး ထုတ်ပြန်တာ ရှိတယ်ပေါ့နော်။ အဲဒါ ပြီးတော့ တရက်လောက် ကြာတော့ စကစ ဘက်က နေပြီးတော့ စာမျက်နှာ ၂၀ ကျော်ပေါ့နော် အဲဒါ ပြန်ထုတ်ပြန်တာ တွေ့ပါတယ်။

အဲလို ထုတ်ပြန်တာ ကြည့်လိုက်တယ်ဆိုရင် စကစ နဲ့ Special Envoy ကြားမှာတော့ အမြင်မတူတာတွေ၊ ဆွေးနွေးတဲ့ အချိန်မှာ တယောက်နဲ့ တယောက် ထောက်ပြတဲ့ဟာတွေ၊ သဘောမတူတာတွေ အများကြီး ရှိတယ် ဆိုတာမျိုးတော့ သတိထားမိတာမျိုးတော့ ရှိပါတယ်။

အထူးသဖြင့်တော့ ခရီးစဉ်နဲ့ ပတ်သက်ပြီး ဘာပြောပြော ဒီ NUG ဘက်ကလည်း သတင်းထုတ်ပြန်တာတွေ ရှိတယ်ပေါ့နော်။ ဆိုတော့ အဓိက အားဖြင့်ပေါ့နော် ကျနော့် ပုဂ္ဂလိက အမြင် အရ ကြည့်ရင်လည်း ပေါ့နော် ဒီ သွားတဲ့ ခရီးစဉ်က Timing က ပြဿနာ ရှိနေတယ်ပေါ့နော်။

တခုက ကျတော့ Special Envoy အနေနဲ့ သူ့ကို ခန့်ထားတယ်၊ တာဝန်ယူတဲ့ ၈ လ အတွင်းမှာ သူ သွားရောက်ခဲ့တဲ့ ဥစ္စာမျိုးပေါ့နော်။ ဒါကတော့ သူ့ mandate မှာ ရှိတဲ့ အတိုင်း သူ အကောင်အထည် ဖော်တာ ဖြစ်တယ်။

ဒါပေမဲ့ Timing ကတော့ ကျနော်တို့ အတွက် နည်းနည်းလေး စိုးရိမ်စရာ ဖြစ်တယ်ပေါ့နော်။ ဘာဖြစ်လို့လဲ ဆိုတော့ ဒီ ကိုဂျင်မီတို့ ကိုဖြိုးဇေယျာသော်တို့ကို ဒီ မတရား သတ်ဖြတ်ပြီး မကြာခင် ၂ ပတ် ကျော်ကျော်လောက်မှာဘဲ သူ သွားတဲ့ ခရီးစဉ် ဖြစ်တဲ့ အတွက်ကြောင့် ပြည်သူတွေ အနေနဲ့တော့ တော်တော်လေးကို မကြိုက်တဲ့ ပုံစံမျိုးကိုတော့ တွေ့ရတယ်ပေါ့နော်။

ဆိုတော့ အောင်မြင်မှု မရှိဘူးဆိုတာမျိုး ကျနော်တို့ ခြုံပြီး ပြောလို့ ရပါတယ်။ ဒါကြောင့် ပြည်သူ့ အသံကို နားထောင်ပါ။ ပြည်သူတွေရဲ့ ဆန္ဒကို နားလည်ပြီးတော့ ဆောင်ရွက်ပါ ဆိုတဲ့ အမြဲတမ်း ပြောနေတာ ရှိတယ်ပေါ့။ အခု ဆိုရင်တော့ ပြည်သူတွေရဲ့ ဆန္ဒ အပေါ် Reflect မလုပ်တာကိုတော့ အရမ်း ပေါ်လွင်သွားတဲ့ ဥစ္စာမျိုးတော့ ရှိပါတယ် ခင်ဗျ။

ဒါကြောင့် ကျနော်တို့ စိုးရိမ်မှု ဆိုတာကတော့ မသွားခင်က စိုးရိမ်တဲ့ ဥစ္စာ အခု သွားပြီးတော့ ဖြစ်ပေါ်လာတဲ့ အပေါ် စိုးရိမ်တဲ့ ဥစ္စာရော ဒါ ထင်ထင်ရှားရှား ရှိတယ် ဆိုတာကိုတော့ ပြောလို့ ရပါတယ်။

ကိုဉာဏ်ဝင်းအောင်။ ။ အဲဒီတော့ ဒီ ကုလ အထူးကိုယ်စားလှယ်က သူ့ခရီးစဉ် အပြီး ထုတ်ပြန်တဲ့ ကြေညာချက်ထဲမှာ သူ သွားရောက်တဲ့ ခရီးစဉ်ဟာ ကုလသမဂ္ဂရဲ့ စိုးရိမ်မှုတွေကို သတင်းစကား ပါးဖို့ရယ်၊ ပဋိပက္ခတွေ၊ ပြည်သူတွေ ခံစားနေရတဲ့ ဒုက္ခတွေ လျော့ပါးရေး အတွက် ခိုင်မာတဲ့ ခြေလှမ်းတွေ လှမ်းနိုင်ဖို့ အဆိုပြုဖို့ ဆိုပြီးတော့ သူ သွားရောက်တဲ့ဟာ ဖြစ်တယ်ပေါ့လေ။

ပြီးတော့ ဒါဟာ တရားဝင်မှုကို အသိအမှတ်ပြုဖို့ မဟုတ်ဘူးလို့လည်း ကြေညာချက်မှာ ပြောပါတယ်။ ဆိုတော့ သူ အဲလို ပြောတဲ့ အချက်တွေ တချက်ချင်းစီ အတွက်ရော ဘယ်လို အချက်တွေက အောင်မြင်မှု ရခဲ့ပြီးတော့ ဘယ်လို အချက်တွေက အလုပ်မဖြစ်ဘူး ဆိုတာမျိုး သံအမတ်ကြီး ပြောပြနိုင်သလဲ ခင်ဗျ။

သံအမတ်ကြီး ဦးကျော်မိုးထွန်း။ ။ ခုန ပြောသလိုပေါ့နော်။ ဒီ သွားတဲ့ ခရီးစဉ်က စကစ ကို အသိအမှတ်ပြုတာ မဟုတ်ဘူးဆိုတဲ့ ဥစ္စာကိုတော့ ကျနော်တို့ ကျေနပ်ပါတယ်။ ဒါပေမယ့် ခုန ပြောတဲ့ လက်စွဲ နုတ်ဆက်တာ၊ အခုဆိုရင် ဓာတ်ပုံတွေ ကြည့်လိုက်ရင် ရယ် ပြုံးပြီးတော့ ထွက်လာတာ ဆိုတာက ပြည်သူတွေရဲ့ ဆန္ဒကို အရမ်း ဆန့်ကျင်နေတာ ဖြစ်တဲ့ အတွက်တော့ ပြည်သူတွေရဲ့ ရိုက်ခတ်မှုကတော့ လက်ရှိမှာရော အနာဂတ်မှာရော ဖြစ်လာနေမယ်လို့တော့ ကျနော်က သုံးသပ်ပါတယ်။

နောက်ပြီးတော့ သူ့ရဲ့ Statement ထဲမှာ ထုတ်ပြန်တဲ့ ဟာထဲမှာလည်း ဘာတွေ ပြောခဲ့တယ် ဆိုတာ ပါတယ်ပေါ့နော်။ ဒီ Violence တွေ ရပ်ဖို့၊ စစ်တပ်ကနေ မတရား လေယာဉ်တွေ အသုံးပြုပြီး ပြည်သူတွေကို အသက် အိုးအိမ် စည်းစိမ်ကို သတ်ဖြတ်တာတွေ ခြိမ်းခြောက်တာတွေ ရပ်တန့်ဖို့ နောက်ပြီး လက်နက်ကြီးတွေနဲ့ ပစ်တာ ရပ်တန့်ဖို့ ဆိုတာတွေကတော့ ဒါ ကျနော်တို့လည်း အမြဲတမ်း တောင်းဆိုနေတာ၊ အမြဲတမ်း တိုက်တွန်းနေတာ ဖြစ်တဲ့ အတွက်ကြောင့် ဒီလိုမျိုး တောင်းဆို တိုက်တွန်းတာတော့ ကောင်းပါတယ်။ ဒါပေမယ့် ထိရောက်လား ဆိုတာကိုတော့ မေးခွန်း ထုတ်စရာ ရှိတာပေါ့နော်။

ဒါကြောင့် ပြန်ကြည့်လိုက်တယ်ဆိုရင် အရင် ကျနော်တို့ ရန်ကုန် အမေရိကန် သံအမတ်ကြီး Scot Marciel သူဆိုရင် ပွင့်ပွင့်လင်းလင်း ပြောထားပြီးသား ဖြစ်တယ်ပေါ့နော်။ ဒီ စစ်တပ်က လူတွေက ဘယ်လိုမှ ထိတွေ့လို့ မရတဲ့ အနေအထား ဖြစ်နေပြီ။ ဒါကြောင့် သူတို့ဟာ ထိတွေ့ဖို့နဲ့ မတန်တော့ဘူး။ သူတို့ကို ဖိအားပေးမှ ရမယ်။

အဲဒီ လမ်းကြောင်း တခုဘဲ ရှိတော့တယ်ဆိုတာကို သံအမတ်ကြီး Scot Marciel က သေသေချာချာကို ပြောခဲ့တဲ့ ဟာမျိုး ရှိပါတယ်။ အဲဒါလည်း ကျနော် သဘောတူပါတယ်။ ဘာလို့လဲ ဆိုတော့ အခု လုပ်နေတဲ့ ကိုင်နေတဲ့ဟာကို ကြည့်လိုက်ရင် ဘယ်လိုမှ သူတို့ အနေနဲ့ ဘယ်သူ့ စကားမှ နားမထောင်ဘဲနဲ့ ရက်စက်တဲ့ ကြမ်းတမ်းတဲ့ ယုတ်မာတဲ့ ဥစ္စာတွေကို လုပ်နေပြီ ဆိုတာကိုတော့ အရမ်းပေါ်လွင်နေပါတယ်။

ကိုဉာဏ်ဝင်းအောင်။ ။ ဟုတ်ကဲ့။ အဲဒီတော့ မစ္စ Heyzer ရဲ့ ခရီးစဉ်နဲ့ ပတ်သက်ပြီးတော့ စစ်ကောင်စီ ဘက်ကလည်း စာမျက်နှာပေါင်း များစွာနဲ့ ပြင်းထန်တဲ့ ကြေညာချက်တွေ ပြန်ပြီးတော့ ထုတ်ပြန်တာ တွေ့ရပါတယ်။ ဘာကြောင့် ဘယ်လို အချက်တွေ အပေါ် အခြေခံပြီး အဲလောက်ထိ တုံ့ပြန်တယ်လို့ သံအမတ်ကြီး ယူဆပါသလဲ။

သံအမတ်ကြီး ဦးကျော်မိုးထွန်း။ ။ ကျနော် မြင်တာကတော့ သူတို့က နှစ်ယောက် အပြန်အလှန် ဆွေးနွေးချက်တွေကို ထုတ်ပြန်တာပေါ့။ ကျနော်တို့ ဝန်ထမ်း စကားနဲ့ ပြောရင်တော့ note of discussion ကို သူက ထုတ်ပြန်တဲ့ သဘောပေါ့။ ဒီလိုမျိုး note of discussion ဆိုတဲ့ ဥစ္စာက ကျနော်တို့ ဝန်ထမ်းဘဝမှာ လျို့ဝှက် ဆိုပြီးတော့ ကျနော်တို့ ၂ ဦးကြားဘဲ သိရမယ့် ဥစ္စာပေါ့နော်။ ဒါကို အပြည့်အစုံကြီး ဒီလိုမျိုး ထုတ်ပြန်လိုက်တဲ့ ဥစ္စာကတော့ တဖက်က ကြည့်ရင် Ethic အရတော့ တော်တော်လေးကို မှားယွင်းနေတယ် ဆိုတာကိုတော့ ထောက်ပြလို့ ရပါတယ်။

ကျနော့် အမြင်တော့ တုံ့ပြန်တာထက် စာရင် သူတို့က နှစ်ဘက် ဆွေးနွေးချက်တွေကို ချပြလိုက်တဲ့ ဥစ္စာမျိုး ဖြစ်တယ်။ ဒါကြောင့် ခုနက ပြောတဲ့ ကျင့်ဝတ်နဲ့တော့ မညီဘူးဆိုတာတော့ ပြောလို့ ရပါတယ်။

ကိုဉာဏ်ဝင်းအောင်။ ။ အဓိက က မစ္စ Heyzer လာတဲ့ ခရီးစဉ်က တရားဝင် အသိအမှတ်မပြုဘူးဆိုတဲ့ ဟာမျိုးကို သူတို့ နာကျည်းသွားတာလား။
သံအမတ်ကြီး ဦးကျော်မိုးထွန်း။ ။ သူတို့ကလည်း သူတို့ တွက်ချက်မှုနဲ့ သူတို့ ရှိမှာပေါ့နော်။ ဘာပြောပြော ကျနော်တို့လည်း သိတဲ့ အတိုင်း စကစ ဆိုတာတော့ တွက်ချက်ပြီးတော့ လုပ်လေ့ လုပ်ထ ရှိတယ်၊ လုပ်လည်း လုပ်နေတာ ဆိုတော့ ဒီကိစ္စမှာလည်း ဒီခရီးစဉ်ကို အသုံးချလိမ့်မယ်။

သူတို့က ဒီ ခရီးစဉ် လာတဲ့ အပေါ် မူတည်ပြီးတော့ ပြောဆိုတာတွေ ထိတွေ့တာတွေ နောက်ပြီးတော့ ရပ်တည်ချက်တွေကိုပေါ့နော် အပြန်အလှန် နှစ်ဘက် ပြောကြတဲ့ အခါမှာ မစ္စ Heyzer Special Envoy အနေနဲ့လည်း ဘာပြောပြော အတွင်းရေးမှူးချုပ်ရဲ့ Special envoy ဖြစ်တဲ့ အတွက်ကြောင့် အတွင်းရေးမှူးချုပ်ရဲ့ မူဝါဒ ရပ်တည်ချက်တွေကိုတော့ သွေဖည်လို့ မရဘူးပေါ့နော်။

အတွင်းရေးမှူးချုပ်က ဟိုးကတည်းက သူက ပြတ်ပြတ်သားသား ရပ်တည်ထားတယ်။ လက်ရှိ အာဏာသိမ်းမှုနဲ့ ပတ်သက်ပြီးတော့ လုံး၀ လက်မခံဘူးဆိုပြီးတော့ စစ်အာဏာသိမ်းမှု ကျဆုံးရမယ်ဆိုတာရယ်၊ ဒီ စကစ ကို လုံး၀ အသိအမှတ် မပြုဘူးဆိုတာရယ် ပေါ့နော်။ ဒါတွေကတော့ သူ့ရဲ့ ရပ်တည်ချက် ဖြစ်တဲ့ အတွက်ကြောင့် အဲဒီ ရပ်တည်ချက် အတိုင်းဘဲ သူက လုပ်ကို လုပ်ရမှာဘဲ။ တဖက်ကလည်း ဒါကို ထွက်ပေါက် ရမလားလို့ လုပ်တယ်လို့ ယူဆ ရတာပေါ့နော်။ ဒါတော့ ကျနော့် အမြင် ပြောတာပါ။ လွဲချင်လည်း လွဲမယ်ပေါ့နော်။

သူတို့ မျှော်လင့်တဲ့ ဥစ္စာကတော့ ဒီကနေ တဆင့် အသုံးချမယ် ဆိုတာမျိုးတော့ ရှိကောင်း ရှိနိုင်တယ်ပေါ့။ ဒါကြောင့် ဒီ သတင်းထုတ်ပြန်တဲ့ အပေါ်မှာ ဆတ်ဆတ်ထိ မခံ ဖြစ်သွားပြီးတော့ ဒီလိုမျိုး ကျင့်ဝတ်တွေကို ဖောက်ဖျက်ပြီးတော့ ချပြတဲ့ အထိ ဖြစ်သွားတယ်လို့တော့ ကျနော် သုံးသပ်ပါတယ်။

ကိုဉာဏ်ဝင်းအောင်။ ။ ဟုတ်ကဲ့။ ကုလ အထူးကိုယ်စားလှယ်ရဲ့ ခရီးစဉ်က အခုလို အစပိုင်းမှာဘဲ စစ်ကောင်စီနဲ့ ကြားမှာ အဖုအထစ်တွေ ဖြစ်သွားတဲ့ အခြေအနေ ရှိသွားတော့ နောက်ပိုင်းပေါ့ ရှေ့ဆက် ကုလသမဂ္ဂ အထူးကိုယ်စားလှယ်နဲ့ စစ်ကောင်စီ တာဝန်ရှိသူတွေကြား ဆက်ဆံရမယ့် ကိစ္စတွေက ဘယ်လိုမျိုး ဆက်ဖြစ်လာနိုင်မယ်လို့ ခန့်မှန်း မိပါသလဲ။

သံအမတ်ကြီး ဦးကျော်မိုးထွန်း။ ။ ဘာပြောပြောပေါ့နော် အခုကလည်း ပထမဆုံး ခရီးစဉ် ဆိုလည်း ဟုတ်တယ် နှစ်ဘက် ယုံကြည်မှု ရရေး အတွက် သွားတယ်ဆိုတဲ့ ပုံစံမျိုး ဖြစ်နေတယ်ပေါ့နော်။ ဒါပေမယ့် ဘယ်လိုဘဲ ဖြစ်ဖြစ် ကျနော်တို့ ပြည်သူတွေက ပြောတာတော့ ရှင်းတယ်။

ဒီ မတရား လူတွေကို အကြမ်းဖက် သတ်ဖြတ်နေတဲ့ လူတွေနဲ့ သွားတွေ့ပြီ ဆိုကတည်းကတော့ လုံး၀ ကိုပေါ့နော် မကြိုက် မနှစ်သက်တဲ့ ပုံစံမျိုး ရှိတယ်။ ဒါကြောင့် ပြည်သူတွေရဲ့ ဆန္ဒကိုတော့ ပြည်သူတွေရဲ့ ခံစားချက်ကိုတော့ ကျော်လွန်ပြီးတော့ ဘယ်လိုဘဲ ဖြစ်ဖြစ် မဆောင်ရွက်သင့်ဘူး လို့တော့ ပြောလိုပါတယ်။

Crd

Leave a Reply

Your email address will not be published.