“ကုလအတွင်းရေးမှူချုပ်ရဲ့ အထူးကိုယ်စားလှယ် စစ်ကောင်စီအကြီးအကဲနဲ့တွေ့မည်”

News

“ကုလအတွင်းရေးမှူချုပ်ရဲ့ အထူးကိုယ်စားလှယ် စစ်ကောင်စီအကြီးအကဲနဲ့တွေ့မည်”

ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် Noeleen Heyzer ဟာ ဒီကနေ့ အင်္ဂါနေ့ မြန်မာနိုင်ငံကို ရောက်လာပါတယ်။ မြန်မာနိုင်ငံဆိုင်ရာ အထူးကိုယ်စားလှယ် ရာထူးခန့်အပ်ခံရပြီး ၁၀ လနီးပါးအကြာ မြန်မာနိုင်ငံကို လာရောက်တာဖြစ်ပြီး မနက်ဖြန် စစ်ကောင်စီအကြီးအကဲနဲ့ တာဝန် ရှိသူတွေကို တွေဆုံမယ်လို့ စစ်ကောင်စီပြောခွင့်ရက ပြောပါတယ်။

မြန်မာနိုင်ငံခရီးစဉ်အတွင်းမှာ မြန်မာနိုင်ငံရဲ့ဆိုးရွားနေတဲ့အခြေအနေတွေနဲ့ လတ်တလော စိုးရိမ်မှုတွေကို အဓိကထားဆွေးနွေးသွားမှာဖြစ်တယ်လို့ Noeleen Heyzer ရဲ့ ခရီးစဉ်နဲ့ပတ်သက်လို့ ကုလသမဂ္ဂရဲ့ထုတ်ပြန်ချက်မှာဖော်ပြထားပါတယ်။ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက ခရီးစဉ်နဲ့ ပတ်သက်လို့ ခုလိုပြောပြပါတယ်။“မနက်ဖြန်မှာ ကျနော်တို့ နိုင်ငံတော်အကြီးအကဲအပါအဝင် သက်ဆိုင်ရာ တာဝန်ရှိသူတွေနဲ့တွေ့ပါလိမ့်မယ်။”

နိုင်ငံရေးအဝန်းအဝိုင်းကပါဝင်ပတ်သက်သူတွေ၊ အရပ်ဘက် အဖွဲ့အစည်းတွေ၊ နောက် လက်ရှိပဋိပက္ခကြောင့် ထိခိုက်ခံစားရတဲ့အသိုက်အဝန်းတွေနဲ့တွေ့ဆုံမယ်လို့ ကုလသမဂ္ဂဘက်ကတော့ သတင်းထုတ်ပြန်ပေမယ့် စစ်ကောင်စီဘက်ကတော့ ခရီးစဉ်အသေးစိတ်ကို ပြောဆိုခြင်းမရှိပါဘူး။

အထိမ်းသိမ်းခံပြီး တရားရင်ဆိုင်နေရတဲ့ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်အပေါ် လဘ်စားမှုနဲ့ နောက်ထပ် ထောင်ဒဏ်တွေ ချမှတ်ပြီး နောက်တရက်မှာ Noeleen Heyzer မြန်မာနိုင်ငံကို ရောက်လာတာပါ။

ခရီးစဉ်အတွင်းမှာ ဒေါ်အောင်ဆန်းစုကြည်အပါအဝင် တရားရင်ဆိုင်နေရသူတွေနဲ့ တွေ့ဆုံခွင်ပေးဖို့တော့ မဖြစ်နိုင်ဘူးလို့ ဗိုလ်ချုပ်ဇော်မင်းထွန်းက ပြောပါတယ်။

“ကျနော်တို့ဘက်ကတော့ တွေ့ဆုံသင့် တွေ့ဆုံထိုက်တဲ့သူတွေထဲမှာ တရားဥပဒေအရ ရင်ဆိုင်နေရတဲ့သူများနဲ့ တွေ့ဆုံနိုင်ဖို့ကတော့ အကန့်အသတ်ရှိတယ်လို့ ပြောပြီးဖြစ်ပါတယ်။ ကျန်တဲ့ တွေ့ဆုံသင့် တွေ့ဆုံထိုက်တဲ့သူတွေကတော့ စီစဉ်ပေးမှာဖြစ်ပါတယ်။ တွေ့ဆုံခြင်း မတွေ့ဆုံခြင်းကတော့ သူတို့ သဘောပါပဲဗျ။”

မြန်မာနိုင်ငံမှာ အကြမ်းဖက်မှုအားလုံး ချက်ချင်းရပ်တန့်ဖို့နဲ့ လူသားချင်းစာနာ ထောက်ထားမှု အကူအညီတွေပေးနိုင်ရေး ကုလသမဂ္ဂဘက်က တောင်းဆိုထားပါတယ်။

အထူးကိုယ်စားလှယ်ရဲ့ခရီးစဉ်မှာ မြန်မာပြည်တွင်းက ယိုယွင်းနေတဲ့ အခြေအနေ ဖြေရှင်းရေးအပြင် အခြားအလေးထားစရာကိစ္စတွေကိုလည်း သူ့ကို ပေးအပ်ထားတဲ့ လုပ်ပိုင်ခွင့် ဘောင်အတွင်းကနေ အဓိကထားလုပ်ဆောင်ဖို့ ရှိတယ်လို့ ကုလသမဂ္ဂဘက်က ပြောဆိုပါတယ်။

စစ်ကောင်စီဘက်ကတော့ အချုပ်အခြာ အာဏာနဲ့ အမျိုးသားအကျိုးစီးပွားကို မထိခိုက် စေတဲ့ ရှေ့ဆောင်ရွက်ရမယ့် လုပ်ငန်းစဉ်တွေကို လုပ်ကိုင်သွားမယ်လို့ ပြောပါတယ်။

“ကျနော်တို့ရဲ့ရပ်တည်ချက်သည် နိုင်ငံတကာ…..ဖြစ်ဖြစ်၊ နိုင်ငံတကာအဖွဲ့အစည်းတွေနဲ့ပဲဖြစ်ဖြစ် အမြဲတမ်းမိတ်ဆွေဖြစ်အောင် ရည်မှန်းချက်ထားပြီး ဆောင်ရွက်နေတာရှိတယ်။ တဘက်နိုင်ငံတွေပဲဖြစ်ဖြစ်၊ တဘက်အဖွဲ့အစည်းတွေရဲ့သဘောထားကတော့ သူတို့သဘောထားအတိုင်းပဲဖြစ်လိမ့်မယ်။ ကျနော်တို့ အနေနဲ့ကတော့ လာတဲ့လူတိုင်း၊ လာတဲ့ကိုယ်စားလှယ်တိုင်းကို ကျနော်တို့မြန်မာနိုင်ငံရဲ့အဖြစ်မှန်တွေ ရှင်းပြတယ်။ ပြောပြတယ်။

လက်ခံခြင်း၊ မခံခြင်းကတော့ သူတို့အပိုင်းပေါ့။ ကျနော်တို့အနေနဲ့ကတော့ ယခင်ရပ်တည်ချက်တွေအတိုင်း ရပ်တည် သွားမယ်။ ကျနော်တို့မြန်မာနိုင်ငံရဲ့ လက်ရှိအခြေအနေတွေ၊ ကျနော်တို့မြန်မာနိုင်ငံရဲ့ အချုပ်အခြာ အာဏာနဲ့ အမျိုးသားအကျိုးစီးပွါးကိုမထိခိုက်စေရေး ဆက်လက်ဆောင်ရွက်ရမယ့်လုပ်ငန်းတွေကို ကျနော်တို့ လုပ်ငန်းစဉ်ငါးရပ်အတိုင်းပဲ ဆက်လက်ဆောင်ရွက်သွားမှာဖြစ်ပါတယ်။”

ကုလသမဂ္ဂ အတွင်းရေးမှူးချုပ်ရဲ့ မြန်မာဆိုင်ရာ အထူးကိုယ်စားလှယ် Noeleen Heyzer က သူတာဝန်ယူပြီး လပိုင်းအတွင်းမှာပဲ မြန်မာနိုင်ငံအတွင်း ပဋိပက္ခအခြေအနေ ပိုပြီး ဆိုးဝါးလာသလို ဘက်ပေါင်းစုံ အကြပ်အတည်းတွေ နေရာအနှံ့ ကြီးမားလာတဲအ့ကြောင်း ကုလသမဂ္ဂ အထွေထွေညီလာခံကို ဇွန်လအတွင်း အလွတ် သဘော တင်ပြခဲ့ပါတယ်။ မြန်မာစစ်တပ်ဟာ အင်အား အလွန်အကျွံ ဆက်လက် အသုံးပြုနေဆဲ ဖြစ်ပြီး အရပ်သားတွေအပေါ်မှာ အပြင်းအထန်တိုက်ခိုက်နေသလို တိုင်းရင်းသားလူမျိုးစုဒေသတွေအတွင်း လေကြောင်းက ဗုံးကျဲတိုက်ခိုက်တာတွေအပါအဝင် ထိုးစစ်ဆင်တိုက်ခိုက်နေတဲ့အကြောင်းတွေကို တင်ပြပြောဆိုထားခဲ့ပါတယ်။

ဒါပေမယ့်လည်း ဒီခရီးစဉ်ကနေ မြန်မာနိုင်ငံရဲ့လူ့အခွင့်အ ရေးအခြေအနေ တိုးတက်လာအောင်နဲ့ စစ်ကောင်စီရဲ့ ရပ် တည်ချက်ကို ပြောင်းလဲအောင် သိမ်းသွင်းနိုင်မယ်ဆိုတဲ့ မျှော်လင့်ချက်မျိုးတော့ အကဲခတ်တွေကြားမှာ မျှော်လင့် ထားတာမျိုး မတွေ့ရပါဘူး။

VOA Burmese

Crd

Leave a Reply

Your email address will not be published.